Əziz yoldaşlar! Dostlar!
Biz yeni, 2019-cu ili qarşılayırıq. 2018-ci ildə yadda qalan əlamətdar hadisələrdən biri də Lenin komsomolunun yaranmasının 100 illiyini təntənə ilə qeyd etməyimiz oldu.
Beynəlxalq kommunist və fəhlə hərəkatı da bir çox mühüm hadisələrlə zəngin
olmuşdur. Yunanıstanın paytaxtı Afinada Beynəlxalq kommunist və fəhlə
partiyaların 20-ci yubiley müşavirəsi keçirilmişdir. Ənənəvi görüşdə dünyanın 50
ölkəsindən 91 partiyanın nümayəndələri iştirak etmişdir.
İrlandiyanın paytaxtı Dublində keçirilmiş dünyanın
35-dən çox ölkəsinin 300 qədər nümayəndəsinin iştirak etdiyi imperializmin
yuvası ABŞ/NATO hərbi bazalarına qarşı birinci beynəlxalq konfrans dünya kommunist
və fəhlə hərəkatının gündən-günə artan gücünü nümayiş etdirdi.
Dünyada inhisarların hökmranlığına qarşı, sülh,
demokratiya və sosializm uğrunda mübarizədə xalq kütlələrinin mübarizəsi
genişlənir, kapitalizmin ümumi böhran şəraitində imperialist burjuaziyanın
mövqeləri laxlayır. Kapitalist istehsal üsulunun daxili ziddiyyətləri
kəskinləşməkdədir. Böhran, ölkəni, burjua cəmiyyətini sarsıtmaqdadır.
Kapitalizmin ümumi böhranı onun dünya miqyasında süqutu dövrünün başlanması
deməkdir.
Sovet adamları Yeni ilin bayram əhval-ruhiyyəsini çox yaxşı
xatırlayırlar. Bu gün isə insanların sabahkı günə ümidi azdır. Çünki burjua
hakimiyyətinin siyasəti onların ümdə mənafelərinə uyğun deyil. Xilas yolumuz
olan marksizm-leninizm təlimindən müasir şəraitə uyğun bəhrələnərək kommunist və fəhlə hərəkatında sıx
birləşməliyik. Bu yolda hər kəs vicdanlı, fədakar əməyini əsirgəməməlidir.
Sosializmə doğru vəzifələrimizin yerinə yetirilməsi hər kəsin təşəbbüsündən və
məsuliyyətindən, ictimai-siyasi proseslərdə fəal iştirakından asılıdır. Bu, həm
də şərəf işimiz və vətənpərvərlik borcumuzdur.
Yeni ilə qədəm qoyarkən sosialist ölkələrinin
zəhmətkeşlərinə səmimi təbriklərimizi və ən xoş arzularımızı yetiririk!
Azərbaycan kommunistləri həmişə onların etibarlı dostu və müttəfiqi olacaqdır.
Dost dövlətlərin xalqlarını hərarətlə təbrik edirik!
Xarici yoldaşlarımıza və dostlarımıza, imperializm və zülm, irtica və müharibə
əleyhinə çarpışan bütün mübarizlərə əmin-amanlıq və səadət arzulayırıq!
Əziz yoldaşlar!
Sayı gündən-günə artmaqda olan işsizlər, kasıblar,
yoxsullar, güzəranı, dolanışığı ağır olan insanlar Yeni ili maddi mərhumiyyətlər şəraitində qarşılayırlar. Sosial problemlər, səfalət girdabında çabalayan insanların ailəsinə, qoy Yeni il xoşbəxtlik və sevinc gətirsin!
Fəhlələri, kəndliləri və burjua ideologiyasını rədd
edən həqiqi ziyalıları Yeni il münasibətilə təbrik edirəm!
Veteran kommunistlərə səmimi Yeni il salamı! Son 27
ildə kommunist hərəkatına hədsiz sədaqət göstərmiş insanlara ən xoş arzularımı
bildirirəm!
Fədakar zəhmətkeş, alovlu vətənpərvər olan
solçu qadınları – qayğıkeş anaları və qadınları səmimi-qəlbdən təbrik edirəm!
Sovet nəsillərin mübarizə ənənələrini davam
etdirən gənclərimizi hərarətli təbrik edirəm!
Bu Yeni il bayramı gecəsində öz əmək və
əsgəri borcunu yerinə yetirənlərin, doğma torpaqdan uzaqda olanların hamısını
təbrik edirəm!
Əziz yoldaşlar, Yeni iliniz mübarək, sizə
yeni səadət arzulayıram!
Ədalət Abdinov,
Azərbaycan Kommunistlər Birliyinin sədri
31 dekabr 2018-ci il
0 Комментарии