Bakı kommunistləri Vladimir İliç Leninin anadan olmasının 149-cu ildönümü münasibətilə tədbir təşkil ediblər

21 aprel  2019-cu il tarixdə Bakı kommunistləri Sovet İttifaqı Kommunist Partiyasınin təşkilatçısı, Sovet dövlətinin banisi, bütün dünya zəhmətkeşlərinin böyük rəhbəri və müəllimi Vladimir Iliç Leninin anadan olmasının 149-cu illiyinə həsr olunmuş  dəyirmi masa keçirdilər.

İştirakçılar dahi Leninin portreti önünə tər çiçəklər qoyaraq  əziz xatirəsini yad etdilər.

Azərbaycan Kommunistlər Birliyinin sədri Ədalət Abdinov “Lenin və Bakı kommunistləri” mövzusunda məruzə etdi. O qeyd etdi ki, Leninin təlimi sovet ölkəsinin bütün xalqlarının müqəddəratında çox böyük tarixi rol oynamışdır. Lenin həqiqətən nəhəng fəaliyyət göstərdiyi bütün illər ərzində Azərbaycan zəhmətkeşlərinin, onların qabaqcıl dəstəsi olan Bakı proletariatının həyatına və mübarizəsinə böyük diqqət yetirirdi. «Rusiyada kapitalizmin inkişafı» əsərində 19-cu əsrin 60-cı illərindən etibarən Bakıda neft hasilatının inkişafından bəhs etmişdir. Lenin Rusiya fəhlə sinfinin inqilabi mübarizəsində çoxmillətli Bakı proletariatına mühüm yer verir, Qafqazda leninçi «İskra» məsləkli sosial-demokrat təşkilatlarının yaradılmasına və möhkəmləndirilməsinə rəhbərlik edir, Bakıda işləyən inqilabçı sosial-demokratlarla sıx əlaqə saxlayır, onlara göstərişlər və məsləhətlər verirdi.

Lenin Bakı iskraçılarının gizli mətbəə yaradıb orada «İskra»nı çap etmək fikrində olduqları haqqında ona məlumat vermiş L.M.Knipoviçə 1901-ci il mayın 15(28)-də yazmışdı: «Siz Rusiyada «İskra»nı necə təşkil etmək fikrindəsiniz?». O zaman Bakıda işləyən mühəndis P.E.Klassona Münxendən göndərdiyi məktubda ondan «işə pul yardımı» göstərməyi xahiş etmişdi. «İskra»nın Bakıdakı agenti LJ.Qalperinə məktublarında Lenin «İskra» qəzetinin Təbriz vasitəsi ilə Rusiyaya göndərilməsindən, «İskra»nın nəşrinin Qafqazda təşkil olunmasından və heç olmazsa, bir nömrəsinin bütöv nəşr etməkdən danışırdı. Bakıda Leninin köməyi ilə yaradılmış gizli «Nina» mətbəəsi 1901-ci ilin dekabrında «İskra»nın 11-ci nömrəsinin matrisadan çap etmişdi.

Lenin menşeviklərin təfriqəçilik fəaliyyətinə  qarşı Bakı bolşeviklərinin mübarizəsinə istiqamət verirdi. O, partiya daxilindəki vəziyyətdən bəhs edən əsərlərində RSDFP Bakı Komitəsinin qətnaməsini də (1904) xatırlatmışdı. Lenin RSDFP-nin 3-cü qurultayını çağırmaq və digər partiya məsələləri barəsində Bakı Komitəsi ilə də fəal yazışırdı.

Lenin Rusiyada 1905-07-ci illər inqilabı dövründə Azərbaycan zəhmətkeşlərinin mübarizəsini yüksək qiymətləndirmişdir. Həmin illərə aid 40-a qədər əsərində Azərbaycanda baş vermiş inqilabi hadisələrdən və bolşeviklərin fəaliyyətindən bəhs olunur. Lenin «proletar tətil mübarizəsinin inadcıllığı cəhətdən» 1905-ci ildə Liflandiya quberniyasının birinci yerdə durduğunu qeyd edərək yazırdı ki, onun ardınca «Bakı quberniyası gəlir; burada hər bir fabrik-zavod fəhləsi, 456 dəfə… tətil etmişdir» (əsərləri, tam külliyyatı, c.19, səh.336).

Vladimir İliç Leninin Bakı proletariatı ilə əlaqəsindən bəhs edən Azərbaycan Kommunist Partiyası Mərkəzi Komitəsinin sədri Gülnisə Mənsimova qeyd etdi ki, inqilabın geri çəkildiyi, irticanın hücumu dövründə də Bakı proletariatı mübarizəni dayandırmırdı. Bununla əlaqədar Lenin 1910-cu ildə yazmışdı: «1908-ci ildə tətilçilərin sayı çox olan quberniyaların birincisi 47 min tətilçisi olan Bakı quberniyasıdır. Kütləvi siyasi tətilin sonuncu mogikanları» (əsərləri, tam külliyyatı, c.19, səh.423).  Lenin irtica dövründə və yeni inqilabi yüksəliş illərində Bakı bolşevik təşkilatının fəaliyyətinə yüksək qiymət vermiş, onu 1910 və 1911-ci illər Rusiyası üçün nümunəvi və qabaqcıl sosial-demokrat təşkilatlarından biri adlandırmışdı.

Lenin Qafqazda milli məsələ ilə dərindən maraqlanır, müxtəlif millətlərin qabaqcıl fəhlələrini birləşdirən Qafqaz bolşevik təşkilatlarının inqilabi işini yüksək qiymətləndirirdi. O, Qafqaz bolşeviklərinin milli məsələni proletariatcasına həll etmək təcrübəsini, beynəlmiləlçiliyini nümunə göstərirdi.

Lenin Azərbaycan bolşevikləri və zəhmətkeşlərinin sosialist inqilabının qələbəsi uğrunda fədakar mübarizəsini diqqətlə izləyir, 1918-ci il mayın 14-də Bakı bolşeviklərinə yazırdı: «Sizin möhkəm və qəti siyasətiniz bizi sevindirir» (Əsərləri, c.35, səh.314).

Lenin Bakı kommunasının işinə və müdafiəsinə hərtərəfli köməyin təşkilatçısı idi. Bakı kommunasının müvəqqəti süqutundan sonra da Lenin Azərbaycan zəhmətkeşlərinin sosial və milli zülmdən azad edilməsi uğrunda bolşeviklərin mübarizəsini daim izləyirdi. O, 1919-cu ilin fevralında fəhlələr və matroslar arasında inqilabi əhvali-ruhiyyənin artdığı haqqında Bakıdan məlumat alan kimi dərhal bu məlumata cavab vermiş, ciddi tədbirlər görüb, bakılıların əhvali-ruhiyyəsindən sürətli və həlledici hərəkət üçün istifadə etməyə çağırmışdı. (əsərləri, c.44, səh.163).

Tədbirdə Azərbaycan Kommunist Partiyası Mərkəzi Komitəsinin büro üzvü Dilbər Ağayeva çıxış edərək görkəmli şəxsiyyət, dünya şöhrətli siyasətçi Vladimir İliç Leninin Sovet Sosialist Respublikaları İttifaqı  tarixində oynadığı roldan, sovet dövlətçiliyi qarşısındakı xidmətlərindən danışaraq bildirdi ki, SSRİ-nin qurucusu və memarı olan bu dahi rəhbərin  həyat və fəaliyyəti hər bir insan üçün nümunədir. Vaxtilə SSRİ-də birləşmiş xalqların hələ neçə-neçə nəsli Vladimir İliç Lenin ideyalarından, onun böyük dövlətçilik məktəbindən ölkələrin inkişafı və rifahı naminə faydalanacaqdır. Dahi şəxsiyyət  düşünülmüş və məqsədyönlü siyasəti ilə sosializmi görmək istədiyi ən yüksək səviyyəyə yüksəltmək üçün möhkəm təməl formalaşdırmışdı. Dünya, o cümlədən Azərbaycan kommunistləri sosializmin qələbəsi naminə imperializmlə mübarizədə dahi Leninin siyasətini əzmlə davam etdirirlər.

Dilbər Ağayeva  bu gün Vladimir İliç Leninin  işıqlı ideyaları dünya, o cümlədən Azərbaycan xalqına xidmət etdiyini söyləyib: "Gənc nəsil Vladimir İliç Leninin irsini, ideyalarını dərindən öyrənməlidir. Mən əminəm ki, hər bir azərbaycanlı dahi Leninə öz dərin hörmətini qəlbində saxlayır".

Kommunistlərdən Əlləz Həsənov və Ərəstun Qurbanov öz çıxışında  Lenin haqqında  ürək sözlərini bildirərək qeyd etdilər ki, bu dahi insan zəhmətkeşlərin yaddaşında qurucu və xilaskar dövlət xadimi,  lider və xalq məhəbbətini qazanan öndər kimi qalmışdır. SSRİ xalqlarının tarixi taleyində, mənəvi, siyasi və ictimai həyatında, dövlət quruculuğunda dahi Stalinlə bərabər  onun qədər misilsiz xidmətlər göstərən ikinci dövlət adamı tapmaq mümkün deyildir. Bu mənada o, sadə fəhlə və kəndlilərin, ziyalıların iftixarı, ürəklərimizdə özünə yer tapan əbədi liderimiz, güvənc yerimiz, qürur duyduğumuz və arxa bildiyimiz böyük kommunistdir.

İştirakçılara Vladimir İliç Leninin anadan olmasının 149-cu ildönümünə töhfə olaraq yeni abdinov.com saytı təqdim olunmuşdur. Saytın baş redaktoru Ədalət Abdinov bildirmişdir yeni marksist-leninçi elektron nəşri kommunist məfkurəsinə maraqla xidmət edəcəkdir. Saytın yaradıcı kollektivi sovet jurnakistikasının təcrübəsini, sovet dövlətçilik yaddaşının qorunması ilə bağlı səyləri bu nəşrin fəaliyyətində davam etdirəcəklər.

Tədbirdə təklif olundu ki, Azərbaycan kommunistlərin təşəbbüsü ilə hər il Vladimir İliç Leninin anadan olduğu 22 aprel tarixdə respublikanın müxtəlif guşələrində ağacəkmə aksiyası keçirilsin.

Azərbaycan Kommunistlər Birliyinin mətbuat xidməti