Partiya dağılıb, aktiv kommunistlər isə geri çəkilmir

                                                                Ədalət Abdinov,

                                      Azərbaycan Kommunistlər Birliyinin sədri

Azərbaycan  Kommunist Partiyasındakı  rüsvayçı parçalanma ölkədə marksizm-leninizm ideologiyasının təbliğinə ağır zərbə vurmuş, partiya təbliğatının yüksək ideyalılığını zəiflətmişdir. Məhz bunun nəticəsidir ki, müasir gənclər sosializm ideyalarının hansı tarixi şəraitdə qələbə çalaçağını, bu ideyaların böyük cazibə qüvvəsinin nədən ibarət olduğunu, zəhmətkeşlərə  düşmən nəzəriyyə və baxışlara   qarşı mübarizədə həmin ideyaların gücünün üstünlüyünün mahiyyətini  bilmirlər.

Narahatlıq doğuran səbəblərdən biri də odur ki, yeni dünya qurucularının beynəlmiləl ideya sərvətini özündə cəmləşdirən marksizm-leninizm ədəbiyyatı müntəzəm surətdə öyrədilmir, bu da cəmiyyətdə sosializm təliminin təsirinə əngəl yaradır. Mən bir daha kommunist düşərgəsinin sağlam qüvvələrinə müraciət edirəm: gəncləri marksizm-leninizm ideyalarının məzmunu ilə tanış edin, onların zehni qüvvəsini həmin ideyaları dərindən mənimsəmək üçün, öz əməli fəaliyyətində tətbiq etməyi öyrənmək üçün səfərbərliyə alın. Əlbəttə, bu müqəddəs işi qarşısına məqsəd qoyanlar, ilk öncə özləri marksizm-leninizmə dədindən yiyələnməlidirlər.

Ölkəmizdə kommunist hərəkatını parçalayan kütbeyinlər öz nadan əməlləri ilə marksist-leninçi siyasi maarifinə ciddi əngəl törətmişlər. Elə buna görə də kommunist düşərgəsində obyektiv gerçəkliyin elmi, dialektik materializm təhlili, cəmiyyətdə baş verən proses və hadisələrin qiymətləndirilməsinə sosializm mövqeyindən yanaşılması çox zəifdir, ictimai inkişaf qanunların tələbləri, obyektiv şərait və subyektiv amillər hərtərəfli nəzərə alınmır. Lenin deyirdi ki, siyasi təhsilin, siyasi ədəbiyyatın vəzifəsi “ibtidadan öyrətməkdir, həm də “yarımelmi” deyil, bütün elmi öyrətməkdir” (V.İ.Lenin. Tam əsərlərin külliyatı, 54-cü cild, səh.210). Kommunist Partiyası qruplara bölündüyünə görə bu gün Azərbaycanda bu iş heç bir sistem və ardıcıllıqla, məqsədəuyğun surətdə aparılmır.

Xüsusilə qeyd etmək istəyirəm ki, hər bir kommunist sosializm elmini kütlələr arasında yaymağa borcludur. Kommunistin vəzifəsi insanları marksizm-leninizm təlimini dərindən öyrənməyə sövq etməkdir. Unutmaq olmaz ki, marksizm-leninizmdən bəhs edən siyasi maarif özünün doğruluğu sayəsində xalqın zehninə və qəlbinə dərin təsir göstərir. 
Marksizm-leninizm zəhmətkeşlərin ideologiyasıdır, zəhmətkeşlər tarixi həqiqəti qəsdən təhrif etməkdə maraqlı olan burjuaziyadan və digər istismarçı siniflərdən fərqli olaraq, ictimai-iqtisadi inkişafın obyektiv qanunauyğunluqlarının dərindən dərk edilməsinə qətiyyət və ardıcıllıqla tərəfdardirlar, öz siyasətini və fəaliyyətini həmin qanunauyğunluqları nəzərə alaraq qurmaq istəyirlər. Bunun səbəbini də izah etmək çətin deyildir. Axı tarixi həqiqət onun tərəfindədir. Buna görə də zəhmətkeşlər dünyanı, onun həqiqətdə mövcud olduğu şəkildə təsvir etməkdə və görməkdə maraqlıdırlar. V.İ.Lenin demişdir: “...Proletariata həqiqət lazımdır və onun işi üçün xoş görünüşlü, gəlişi gözəl meşşan yalanından daha zərərli bir şey yoxdur” (V.İ.Lenin. Əsərləri, 5-ci cild, səh.322).

V.I.Lenin partiya işçilərindən tələb edirdi ki, onlar daim xalq içərisində olsunlar, onun qayğı, ehtiyac, tələb və mənafeyini dərindən öyrənsinlər, fərəh və kədərinə şərik olsunlar, xalqa həqiqəti, ancaq həqiqəti desinlər, ondan heç bir şey gizlətməsinlər, heç bir şeyə bəzək-düzək verməsinlər.

Azərbaycan Kommunist Partiyasının kiçik qruplara bölünüb böhran keçirməsinə baxmayaraq, fəal kommunistlər ictimai hadisə və prosesləri daim hərəkətdə və təbii qarşılıqlı əlaqədə nəzərdən keçirməklə, onların inkişafının əsas xəttini və başlıca meyllərini tapmaqdan və bunun əsasında respublikanın həqiqi ictimai-siyasi mənzərəsini təqdim etməyi bacarmalıdırlar.