Abidəyə biganə icra hakimiyyəti

İkinci Dünya müharibəsi illəri bəşəriyyətin XX əsrdə üzləşdiyi ən ağır və dəhşətli dövr olmuşdur. Azərbaycan xalqının ümummilli lideri Heydər Əliyev demişdir: “Azərbaycan xalqı II Dünya müharibəsində həm döyüş meydanlarında, həm də arxa cəbhədə əsl şücaət və əzmkarlıq nümunələri göstərmişdir”. Onların sırasına Lənkəran rayonunun Vilvan kəndinin övladları da daxildir ki, İkinci Dünya müharibəsi illərində böyük qəhrəmanlıq nümunələri göstərmiş, kənd bütün maddi və mənəvi sərvətlərini, insan qüvvəsini faşizmə qarşı müharibəyə cəlb etmişdi.

İndiki nəsil o qanlı-qadalı illərdə baş verən hadisələr barədə daha dolğun və obyektiv məlumat almağa ehtiyac duyur. Qanlı-qadalı döyüşlərdə canını qurban vermis və əbədiyyətə qovuşmuş igidlərin şərəfinə Vilvan kəndinin mərkəzində ucaldlmış abidənin mühüm tarixi, siyasi və əməli əhəmiyyətə malikdir.

Ümummilli liderimiz Heydər Əliyev vaxtilə müharibə, əmək və silahlı qüvvələr veteranları ilə görüşdə demişdir ki, Azərbaycan xalqı, ictimaiyyəti müharibədən sonrakı illərdə sizi yüksək qiymətləndirdiyi kimi, sizin fəaliyyətinizi, əməyinizi, xidmətlərinizi, rəşadətinizi bu gün də qiymətləndirir və bundan sonra da qiymətləndirəcəkdir. Təəssüf ki, həlak olmuş müharibə iştirakçılarının rəşadətini, əziz xatirəsini özündə təcəssüm etdirən abidəyə yerli icra və bələdiyyə orqanlarının laqeydliyi, biganəliyi belə deməyə əsas verir ki, ulu öndərin tövsiyələrinə Vilvan kəndində əməl olunmur. Bu isə dünya sivilizasiyasını faşizm təhlükəsindən qurtarmaqda yardımını əsirgəməyən və ölümün gözünə dik baxan vilvanlı igidlərin ruhu qarşısında bağışlanmaz haldır.

Abidənin ərazisinin bir hissəsinin satılması faktını Lənkəran Şəhər İcra Hakimiyyətinin 24.10.2014-cü il tarixli D-13/2 nömrəli məktubunda təsdiq olunur. Vilvan kənd sakini Dadaşov Rafiq Salah oğluna ünvanlamış həmin məktubda yazılır: “Sözü gedən yerdə 300 kv.m. torpaq Vilvan bələdiyyəsinin 2007-ci il 06 avqust tarixli 31 saylı qərarı ilə Nail Rzayevə sahibkarlıq fəaliyyəti üçün alqı-satqı qaydasında satılmışdır”.

İcra hakimiyyəti rəsmi məktubunda bələdiyyənin satdığı torpağı abidənin ətrafındakı abidə kimi qeyd edir. Vilvan bələdiyyəsinin sədri N.Quliyeva 20.IV.2015-ci il tarixli 18 nömrəli məktubunda isə rəsmiləşdirdiyi alqı-satqını onunla əsaslandırır ki, bu torpaq sahəsinin abidənin ərazisi olması barədə heç bir qanunamüvafiq sənəd yoxdur.

Yerli icra və bələdiyyə orqanların təzadlı, ziddiyyətli mövqeyi hüquqi məsuliyyət yaradır. Lakin bizi məsələnin mənəvi-əxlaqi tərəfi daha çox düşündürür. İnsanlar Vətən uğrunda, torpaq uğrunda şirin canlarından keçiblər, həlak olublar. Onların adı olan yerə hər kəs hörmət və ehtiram göstərməyə borcludur. İkinci dünya müharibəsində həlak olan vilvanlıların ruhu gəzən o torpağı satan bələdiyyə də, alver məqsədi ilə orada gözü olan vətəndaş da bunu anlamalı, dərk etməlidir.

Uzun illər abidənin ərazisinin işbazlardan qorunması, saxlanılması üçün vətəndaş nümunəsi göstərən Vilvan kənd sakini Rafiq Dadaşovun abidənin bugünkü acınacaqlı vəziyyəti barədə dedikləri bizdə kədərli təəssürat yaratdı. Abidənin obelisk, yəni yuxarıya doğru getdikcə nazikləşən, yonulmuş daş sütundan ibarət hissəsi tamamilə sökülüb bərbad vəziyyətə düşüb. Üzərində “!941-1945” yazılmış süni ot örtüyü cürüyüb yararsız haldadır

Abidənin palçıq üzərində olan giriş qapısı – kiçik ölçülü dəmir çərçivə sıradan çıxmaq üzrədir. Ərazini kiçik bağça ilə ayıran ağ rəngli yaraşıqlı bordür sökülüb, sındırılıb və yerə sərilib. Burada sanitariya qaydalarına da əməl olunmur, zibil qalaq-qalaqdır, belə getsə abidənin ərazisi “zibil poliqonu”na çevriləcək.

Abidəni ziyarətə gələn yaşlı adamlar üçün ərazidəki kiçik bağçada skamiyalar qoyulmamış, gecə vaxtı buranın işıqlandırılması isə ümumiyyətlə unudulmuşdur.

Bu abidənin sənətkarlıq qiyməti ilə bərabər, vilvanlılar üçün bəlkə daha da böyük qiyməti qəhraman oğullarının fədakarlığını, igidliyini göstərməsidir. Əgər burada laqeydlik, biganəlik, baxımsızlıq hökm sürürsə, yerli hakimiyyət xoşagəlməz vəziyyət dərhal araşdırılmalı, cavabdeh şəxslərdən məsuliyyət tələb olunmalıdır.

Ədalət Abdinov