Burjuaziya nüfuzunu itirir - kommunistlərə inanırlar

                                                                Ədalət Abdinov,

                                 Azərbaycan Kommunist Partiyası Mərkəzi Komitəsinin katibi

Dünya siyasətində kapitalizmin hegomonizm ideologiyası iflasa uğramaqdadır. Beynəlxalq həyatda kəskin dönüş mərhələsi başlanır. Kommunist düşüncəsi imperializmin təcavüzkar planlarını alt-üst edir. Sosializmin mövqelərini əhəmiyyətli dərəcədə möhkəmləndirən yeni İttifaq yaranmaq üzrədir. İnsanların kommunist ideologiyasına meylliliyi güclənməkdədir. Əsrlər boyu imperializmin öz qanlı caynağına aldığı ölkələrdə də solçuluq xilas yolu kimi qəbul edilməkdədir.

Azərbaycan Kommunist Partiyasının Proqram və Nizamnaməsini qeyd-şərtsiz qəbul edib bəyənənlərin, Proqram və Nizamnamənin bütün müddəalarına şərik olanların sayı da artmaqdadır. İnsanlar kommunistlərin sırasına şüurlu surətdə, öz əqidəsinə görə qoşulurlar. Bu, həmin adamların kommunist dünyagörüşünə malik olduğuna, onların ideya, təşkilat və siyasi mövqelərinin aydın olduğuna sübutdur.

Proqram və Nizamnaməni qəbul etməklə kommunist öz öhdəsinə bu sənədlərin tələbləri əsasında hərəkət etmək vəzifəsini götürür. Proqram və Nizamnamə partiyalılığın meyarıdır. Bunları rəhbər tutaraq, kommunistin fikir və hərəkətlərinin, davranışının nə dərəcədə düzgün, partiya xəttinə nə dərəcədə uyğun olduğunu müəyyən etmək mümkündür.

Həyatın sübut etdiyinə görə, partiya ancaq həmfikir adamları öz sıralarında birləşdirdiyi zaman döyüş qabiliyyətinə malik olur. Buna görə də o, partiya sıralarına daxil olmaq istəyən adamın Proqram və Nizamnamə ilə tanış olub-olmadığını, bunları qəbul edib-etmədiyini, partiyanın baxışlarına şərik olub-olmadığını qəbul zamanı ciddi surətdə aydınlaşdırır. Partiya öz üzvlərindən hər birinin öz bilik dairəsini müntəzəm surətdə genişləndirməsinə, Proqram və Nizamnaməni dərindən öyrənməsinə çalışır, marksizm-leninizm nəzəriyyəsinə yiyələnməkdə kommunistə kömək edir.

İdeya və təşkilat baxışlarının vəhdəti hərəkət birliyi üçün zəruri və çox mühüm şərtdir. Partiyanın Proqram və təşkilat prinsiplərini ancaq “ümumən və bütövlükdə” qəbul edən, bəzi partiya məsələlərdə isə partiyanın mövqeyindən fərqli mövqe tutan, yaxud partiyanın nöqteyi-nəzərinə qeyd-şərtlə tərəfdar çıxan və şübhə ilə yanaşan adamlar partiyaya yol tapdıqda, partiya sıralarına labüd olaraq inamsızlıq və səndələmə ünsürləri gətirirdilər. Təəssüf ki, belə faktlar var. Həmin boşboğazların səbatsızlığı, yanlış mövqeyi, adətən mübarizənin həlledici anlarında, ən çətin dövrlərdə aşkara çıxır.

Əgər partiya dözüb belə arzuolunmaz şəxsləri öz tərkibində saxlasaydı, onda Leninin sözləri ilə desək, əvvəl ideya, sonra isə təşkilat cəhətdən hökmən parçalanıb dağılardı. Məlumdur ki, hər hansı bir partiya özünü necə inqilabçı partiya adlandırsa da, əgər onun sıralarında marksist Proqram və Nizamnamə müddəalarından kənara çıxan adamlar fəaliyyət göstərmişlərsə, belə bir partiyanın fəhlə sinfinə və bütün zəhmətkeşlərə heç bir zaman az-çox xeyri dəyməmişdir.

Kommunist və fəhlə partiyalarının ideya və təşkilat əsaslarını imperializmin bütün vasitələri ilə laxlatmağa cəhd etdiyi  hazırki  zamanda hər cür səbatsızlıq və dağınıqlıq təzahürləri xüsusilə dözülməzdir. Azərbaycan Kommunist Partiyasının Proqramını və Nizamnaməsini, ancaq tamamilə qəbul edən şəxs Azərbaycan Kommunist Partiyasının üzvü ola bilər.

Kommunist Partiyası inqilabi fəaliyyət partiyasıdır. Kommunist Partiyası ona görə qələbələrə nail olmuşdur ki, nəzəriyyə ilə praktikanın, sözlə işin, qərarla icranın vəhdəti onun fərqləndirici xüsusiyyətidir. Lenin qeyd edirdi ki, kommunist ancaq o adamdır ki, “işdə partiyanın taktiki xəttini yeritsin”, partiya üzvləri  “göstərməlidirlər ki, işdə kommunizm prinsiplərini tətbiq edirlər” (V.İ.Lenin. Əsərləri, 17-ci cild, səh.217; 30-cu cild, səh.179). Buna görə də Azərbaycan Kommunist Partiyası sosializm uğrunda mübarizədə fəal iştirak etməyi öz sıralarında üzvlük şərtlərindən ən əsası sayır. Partiyamız Leninin belə bir göstərişinə əməl edir: on nəfər işləyən adamın özünü partiya üzvü adlandırmaması bir nəfər boşboğaz adamın partiya sıralarında ola bilməsindən daha yaxşıdır”.

Kommunistin fəallığı, ən əvvəl, onun tapşırılmış işə münasibətində təzahür edir. Hər bir kommunist partiyanın siyasi xətti naminə çalışdığı sahədə nə mümkünsə, hamısını etməyə borcludur. O, sovet həyat normalarının təbliğinin nümunəsi olmalıdır.

İnsanların kommunist tərbiyəsi, onların marksizm-leninizm dünyagörüşü ilə silahlandırılması kapitalizmin eybəcərliklərinin ifşasında, sosializm quruculuğunda olduqca böyük rol oynayır. Kommunist bu işlərdə ən yaxından iştirak etməlidir. O, partiyanın sözünü cəmiyyətə çatdırmalı, adamlara kommunist ideyalılığı aşılanmasına kömək etməli, burjua ideologiyasına qarşı barışmaz mübarizə aparmalıdır. 

Kommunist bütün partiya ilə birlikdə çalışmalıdır ki, kapitalizm bəlasından əziyyət çəkən cəmiyyətimizin hər bir üzvü sosializmin şüurlu və fəal qurucusu olsun və bu işdə öz üzərinə düşən məsuliyyəti hiss etsin. Solçuların birləşdiyi təşkilatların fəallıq və təşəbbüskarlığını yüksəltməyə, onların fəaliyyətini yaxşılaşdırmağa kömək  göstərmək, ictimai həyatda yaxından iştirak etmək və bitərəfləri də bu həyata cəlb etmək kommunistin balavasitə vəzifəsidir.