Kommunistin xatirəsi yad edildi

Bu gün Azərbaycan ictimai-siyasi həyatında iz qoymuş, beynəlxalq kommunist və fəhlə hərəkatının fəallarından biri, Azərbaycan Kommunist Partiyası Mərkəzi Komitəsinin təşkilat məsələləri üzrə katibi Rəhim Həsən oğlu Həsənovun vəfatının ikinci ildönümü münasibətilə əqidə yoldaşları tərəfindən Abşeron rayonundakı Qobu qəsəbəsindəki qəbrstanlıqda onun məzarı ziyarət edilmişdir.

Rəhim Həsənovun əbədiyyətə qovuşduğu tarix – 5 aprel 2024-cü il  onun həyat və fəaliyyətinə bir daha nəzər salmaq, ideoloji mübarizədə və təşkilati işdə göstərdiyi xidmətləri xatırlamaq üçün həm də mühüm bir fürsətdir.

Rəhim Həsənov Azərbaycan cəmiyyətinin mürəkkəb sosial-siyasi dövrlərindən birində yetişmiş, gənc yaşlarından ictimai fəaliyyətə qoşulmuşdur. Onun dünyagörüşünün formalaşmasında sosial ədalət, bərabərlik və zəhmətkeşlərin hüquqlarının müdafiəsi kimi ideyalar mühüm rol oynamışdır.

O, təhsil aldığı illərdən etibarən ictimai fəallığı ilə seçilmiş, tələbə və gənclər arasında təşkilatçılıq qabiliyyəti ilə tanınmışdır. Bu xüsusiyyətlər sonradan onun siyasi fəaliyyətində əsas dayaqlardan birinə çevrilmişdir.

Rəhim Həsənov sovet dönəmində Sumqayıt Şəhər Partiya Komitəsində, müstəqillik dövründə isə 1994-cüldən başlayaraq ömrünün sonuna qədər Azərbaycan Kommunist Partiyasında məsul vəzifələrdə çalışmış, xüsusilə təşkilati məsələlər sahəsində böyük təcrübə toplamışdır. O, partiyanın Mərkəzi Komitəsində təşkilat məsələləri üzrə katib kimi fəaliyyət göstərərək partiya strukturlarının gücləndirilməsi, rayon təşkilatların fəaliyyətinin əlaqələndirilməsi, gənc kadrların irəli çəkilməsi və hazırlanması, ideoloji işin sistemləşdirilməsi istiqamətlərdə mühüm işlər görmüşdür:

Onun rəhbərliyi ilə aparılan təşkilati tədbirlər partiyanın fəaliyyətinin daha səmərəli qurulmasına, üzvlər arasında nizam-intizamın möhkəmlənməsinə və ideoloji birliyin gücləndirilməsinə xidmət etmişdir.

Rəhim Həsənov yalnız ölkə daxilində deyil, beynəlxalq səviyyədə də fəal olmuşdur. O, müxtəlif ölkələrin kommunist və fəhlə partiyaları ilə əlaqələrin qurulmasında və inkişaf etdirilməsində iştirak etmiş, beynəlxalq konfrans və görüşlərdə Azərbaycan kommunistlərinin mövqeyini təmsil etmişdir.

Bu fəaliyyət onun siyasi baxışlarının daha da genişlənməsinə, həmçinin qlobal fəhlə hərəkatının problemlərinə yaxından bələd olmasına şərait yaratmışdır.

Rəhim Həsənov təkcə siyasi xadim kimi deyil, həm də yüksək insani keyfiyyətlərə malik bir şəxsiyyət kimi xatırlanır. Bu müdrik insanı  tanıyanlar onun:prinsipiallığını, sadəliyini, insanlarla səmimi ünsiyyət qurmaq bacarığını və əqidəsinə sədaqətini xüsusilə qeyd edirlər. O, hər zaman öz məsləkinə sadiq qalaraq, çətinliklər qarşısında geri çəkilməmiş, ideyaları uğrunda mübarizəni həyatının əsas məqsədi hesab etmişdir.

Rəhim  Həsənovun vəfatından iki il keçməsinə baxmayaraq, onun ideyaları və fəaliyyəti onu tanıyanların və davamçılarının yaddaşında yaşayır. Onun təşkilati təcrübəsi, siyasi baxışları və mübarizə ruhu bu gün də bir çoxları üçün örnək hesab olunur.

Bugünkü mərhələdə onun irsinin öyrənilməsi və təbliği, xüsusilə gənc nəsil üçün mühüm əhəmiyyət kəsb edir. Çünki o, yalnız keçmişin nümayəndəsi deyil, həm də gələcək üçün müəyyən dəyərlər və prinsiplər qoyub getmiş bir şəxsiyyət idi

5 aprel 2026-cı il – Rəhim Həsən oğlu Həsənovun vəfatının ikinci ildönümü – onun həyat yoluna hörmət və ehtiramla yanaşmaq, gördüyü işləri dəyərləndirmək və xatirəsini yaşatmaq üçün mühüm bir gündür.

Onun həyat devizi olan sosial ədalət, bərabərlik və təşkilatlanma ideyaları bu gün də aktuallığını qoruyur. Rəhim Həsənovun adı Azərbaycan kommunist hərəkatının tarixində özünəməxsus yer tutur və gələcək nəsillər tərəfindən də xatırlanacaqdır.

Ədalət Abdinov