ZİBİL YEŞİYİNDƏN ÇIXAN BƏYANAT

                                                               ƏDALƏT ABDİNOV

Dövlət qeydiyyatı olmadığı halda fırıldaqçılıq edib kommunistlərə qeydiyyatdan keçməsi barədə uzun illər ərzində utanıb - qızarmadan yalan danışan və onları aldadan qeyri-rəsmi Azərbaycan Kommunist Partiyası Mərkəzi Komitəsinin qondarma birinci katibi Telman Nurullayev bəyanat adlı cızmaqara quraşdırıb və haqlı əməlimizlə bağlı təbii fikir müxtəlifliyi olan  şəraitdə "işverənlik" xislətinə sadiq qalıb. Məkr, hiylə, müxənnətlik yolunun yolçusu olan bu gerizəkalı mənim ünvanıma hədyanlar söyləyib. Fitnəsi də odur ki, guya mən 26 Bakı komissarlarının məzarını ziyarət etməklə ictimaiyyət arasında qarşıdurmalar yaratmışam. Burada musavatçılarla onların sədaqətli nökəri Telmanın dedikləri üst-üstə düşür. Bax, buna deyərlər həyadan uzaq namərdlik! Elə həmin Telman dəfələrlə bizi öz şəxsi avtomobilində 26 Bakı komissarların məzarını ziyarət etməyə aparıb və öz çirkli əlləri ilə ora gül dəstəsi qoyub. Aşağıda təqdim etdiyim şəkillər də dediklərimi sübut edir.

Rəzillik həqiqətə qənim kəsilən yerdə biqeyrətlik normalaşır. Vicdan səddinin asanca keçən, ləyaqət hissini tapdalan Telman hiyləgərcəsinə bunları uydurur: “…dövlətçiliyin əksinə olan bəyanatları nəzərə alınaraq, Ədalət Abdinov AKP MK rəhbərliyindən və partiya üzvlüyündən də azad edilmişdir”. Bu tülüngüdən soruşuram: belə bəyanat harada və nə vaxt verilib? Yoxdur belə bir bəyanat! Bilinən odur ki, Telman kimi namərdlər üçün mənəvi hakim yoxdur! Bu cür fəndgirliyin özü isə  nakişilikdir, əclaflıqdır! Hiyləgərlikdə də bir alçaqlıq var.

Böhtançının mənəviyyatı həmişə ləkəli olar. Telmanın etdiyi saxtakarlıqlardan biri də odur ki, guya məni  Azərbaycan KP MK-nın 30 iyul 2017-ci il tarixli plenumunda partiya sıralarından azad edib. Halbuki mən partiya dövlət qeydiyyatından keçmədiyi və qeyri-qanuni fəaliyyət göstərdiyi üçün,  bu barədə Telmanın yalanları, fırıldağı məlum olandan sonra uçotda durduğum Xətai rayon partiya təşkilatının 07 may 2017-ci il tarixli qərarı ilə ərizəm əsasında çıxmışam. 

Bu fakt Telmanın bəyanatının  iftira, böhtan, şər  olduğunu bir daha təsdiq edir. 

Partiyasında olmayan adamı partiyadan çıxarmaq fırıldağı, badalağı  ilə məşğul olan kəsdən hər cür şər-böhtan, saxtakarlıq gözləmək mümkündür. Ən əsası odur ki, plenumun kommunisti partiyadan azad etmək səlahiyyəti yoxdur, bu məsələ ilk təşkilatda həll olunur. Gördüyünüz kimi Telman öz kooperativ partiyasında kələkbazlıqla, bicliklə, aldatma ilə məşğuldur. Bu onu göstərir ki, Telman və onun rəhbərlik etdiyi kooperativ partiyasının MK və MK bürosunun üzvləri partiya Nizamnaməsinin tələblərini bilmir və ya bildikləri halda qəsdən pozmuşlar. Hər iki hal  onlara başucalığı gətirmir. İkincisi, əgər məni partiyalarının üzvü hesab edirdilərsə, mənim məsləm həll edildiyi halda, məni niyə plenuma dəvət etməmişlər. Dəvət etmiş olsaydılar, mənim onların partiyasında olmadığımı bilərdilər. Belə fəaliyyət göstərən partiyanın bəyanatı da onun kimi saxtadır, uydurmadır, qəlpdir, yalandır. Hələ bəyanat qəbul etmiş MK bürosunun çağırılıb-çağırılmaması da şübhəlidir. Aldığım məlumata görə, Telman növbəti yalanını uydurur, belə bir büro keçirilməmişdir.

Bəyanat da bir həqiqətlə razıyam ki, mənim Telmanın manqa partiyası ilə heç bir əlaqəm yoxdur!

Namərdlər həmişə mərdə qibtə ediblər, gücləri catmadığı üçün yanıblar, qovrulublar və bacardıqları hiyləyə,  fırıldağa, fəndə, məkrə əl atıblar. Kommunistlər arasında urvatı, hörməti, izzəti, nüfuzu, etibarı olmayan Telmanın növbəti kələyi olan bu qondarma, uydurma, saxta, süni, yalançı bəyanat heç zibil yeşiyinə də layiq deyil.