Kuba Respublikasının ölkəmizdəki fövqəladə və səlahiyyətli səfiri Alfredo Nives Portundo Azərbaycan kommunist hərəkatının öncülləri ilə görüşmüşdür

18 fevral 2019-cu ildə Kuba Respublikasının Azərbaycan Respublikasındakı fövqəladə və səlahiyyətli səfiri Alfredo Nives Portundo Azərbaycan Kommunistlər Birliyinin sədri Ədalət Abdinovu və Azərbaycan Kommunist Partiyası Mərkəzi Komitəsinin sədri Gülnisə Mənsimovanı qəbul etmişdir.

Səfir Alfredo Nives Portundo bildirmişdir ki, Amerika Birləşmiş Ştatlarının qanunsuz sanksiya siyasətinə, ticarət-iqtisadi və maliyyə blokadasına baxmayaraq, Kuba çox şeyə nail olmuşdur. Vaşinqton azadlıq adasını dünya ölkələrindəm təcrid edə bilməmişdir. ABŞ və İsraıldən başqa dünyanın bütün ölkələri Kubaya iqtisadi təzyiqə etiraz edir və Vaşinqtonun suveren Kubaya qarşı iqtisadi siyasətini pisləyən BMT Baş Assambleyasının qərarına səs verirlər.

Azadlıq adasının hazırda dünyanın demək olar ki, bütün dövlətləri ilə mehriban dostluq münasibəti var - Səfir Alfredo Nives Portundo demişdir – Təkcə ötən il dünyanın 30 ölkəsinin rəhbəri Kubada olmuşdur. Prezident Donald Trampın rəhbirliyi ilə ABŞ isə Kubanın əlehinə siyasəti kəskinləşdirməkdə davam edir. Buna baxmayaraq, rəsmi Havana bəyan edir ki, ABŞ hökuməti ilə bərabərlik və qarşılıqlı hörmət əsasında həmişə dialoqa hazırdır.

Kubanın yeni Konstitusiya lahiyəsinə toxunan səfir Alfredo Nives Portundo qeyd etmişdir ki, Kuba Xalq Hakimiyyətinin Milli Assambleyası (parlament) ölkənin yeni Konstitusiyasının layihəsini bəyənmiş və 24 fevral 2019-cu ildə ümumxalq refetrendumuna çıxarmışdır.

Azərbaycan Kommunistlər Birliyinin sədri Ədalət Abdinov ölkədə kommunist  hərəkatının vəziyyəti barədə ətraflı məlumat vermişdir. O, qeyd etmişdir ki, ölkəmizdə  Azərbaycan Kommunist Partiyası dörd yerə parçalanmışdır, bu da marksizm-leninizm ənənələrinə uyğun deyildir.

Azərbaycan Kommunist Partiyasının qruplara bölünməsində burjuaziyanın xidmətlərini istisna etmirəm – Ədalət Abdinov demişdir -  Mövcud çətin vəziyyətə baxmayaraq, sıravi kommunistlər sosializm uğrunda mübarizəni partiyanın bölünmüş qruplarında davam etdirirlər.

Ədalət Abdinov bildirmişdir ki, ölkəmizin dövlət başçısı İlham Əliyev hələ 07 dekabr 2016-cı ildə Kubanın Azərbaycanda yeni təyin olunmuş səfiri kimi Sizin  etimadnamənizi qəbul edərkən  Azərbaycanda Fidel Kastroya böyük rəğbət bəsləndiyini qeyd etmişdir. Bununla da o, Azərbaycan xalqı ilə bərabər həm də bu xalqın ön sırasında gedən kommunistlərin marağını ifadə etmişdir.

Azərbaycan kommunistləri ölkələrimiz arasında siyasi, humanitar, idman sahələrində yaxşı münasibətlərin formatının qurulduğunu vurğulayan dövlətimizin başçısının  Azərbaycanın Kuba ilə iqtisadi əlaqələrin və ticarət dövriyyəsinin artırılmasında və eləcə də səhiyyə sahəsində əməkdaşlıqda maraqlı olduğunu bildirən fikrini tam dəstəkləyirlər. Azərbaycan kommunistləri Prezident İlham Əliyevin  “ölkələrimiz arasında  turizm sahəsində də əməkdaşlıq üçün yaxşı potensial mövcuddur” fikri ilə də tam razıdırlar. Prezident İlham Əliyev bildirmişdir ki, Kubada turizm biznesi çox fəal inkişaf edir və artıq bir çox Azərbaycan vətəndaşları Kubaya səfər edir, istirahətə gedir. Azərbaycan kommunistləri də Prezident İlham Əliyevivin istəyinə dəstək olaraq arzulayırlar ki,  kubalılar da ölkəmizə gəlsin və Azərbaycanla yaxından tanış olsunlar.

Ölkələrimiz arasında iqtisadi, ticarət əlaqələrinin inkişaf etdirilməsinin önəminə toxunan Azərbaycan KP MK-nın sədri Gülnisə Mənsimova bunun üçün yaxşı imkanların olduğunu vurğulamışdır.

Azərbaycan kommunist hərəkatının öncülləri Kuba Respublikasının ölkəmizdəki fövqəladə və səlahiyyətli səfiri Alfredo Nives Portundoya gələcək fəaliyyətində uğurlar arzulamışlar.
Kuba Respublikasının ölkəmizdəki fövqəladə və səlahiyyətli səfiri Alfredo Nives Portundo da ölkəsinin Azərbaycan kommunist təşkilatı ilə sıx əməkdaşlıqda maraqlı olduğunu bildirmişdir

                                                                Azərbaycan Kommunistlər Birliyinin mətbuat xidməti