Solçular Sovet Azərbaycanın 99 illiyini qeyd etdilər

Azərbaycan torpağı üzərində Sovet hakimiyyətinin al bayrağının qalibiyyətlə dalğalandığı tarixi gündən indi 99 il ötür. Sovet Azərbaycanın bu ilki 99-cu baharı xüsusilə əlamətdardır; bu bahar bu yaxınlarda qeyd etdiyimiz dünyada birinci fəhlə-kəndli dövlətinin banisi V.İ.Leninin anadan olmasının 149 illiyi bayramının şöləsi ilə nurlanmışdır.

Azərbaycan Kommunistlər Birliyi Azərbaycan Kommunist Partiyası ilə birlikdə Sovet Azərbaycanın 99 illiyini təntənə ilə qeyd etmişdir.

Bu əlamətdar hadisə münasibətilə tədbir iştirakçılarınını təbrik edən Azərbaycan Kommunistlər Birliyinin sədri Ədalət Abdinov dedi:

“Oktyabrın böyük rəhbəri V.İ.Lenin həmişə bolşeviklərin qalası sayılan Azərbaycanın zəhmətkeşlərinin inqilabi ruhunu və sinfi yetkinliyini yüksək qiymətləndirirdi. Leninçi “Vperyod” qəzeti 1905-ci ildə yazırdı: “Bakı hadisələri bütün Qafqazı inqilabiləşdirir”. V.İ.Lenin birinci rus inqilabı illərində Rusiya proletariatının sinfi vuruşmalarına yekun vuraraq Bakı fəhlələrinin “kütləvi siyasi tətilin son nümayəndələri” adlandırmışdı. Lenin ideyalarının yayılmasında Bakıdakı gizli “Nina” mətbəəsi mühüm rol oynadı. N.K.Krupskayanın dediyi kimi, Bakı “iskraçı” təşkilatın dayaq məntəqəsi idi. Bakı mətbəəsi az qala bütün Rusiyanı “İskra ilə təchiz edirdi”. Lenin Zaqafqaziya partiya təşkilatlarının, xüsusən Azərbaycan partiya təşkilatının gözəl beynəlmiləl ənənələrini yüksək qiymətləndirirdi. İliç onlarda milli məsələnin yeganə düzgün həlli olan  millətlərarası qardaşlıq nümunəsini görürdü”.

“Azərbaycanda Sovet hakimiyyətinin qələbəsi Böyük Oktyabrın əks-sədası idi, proletar inqilabı haqqında Lenin ideyalarının daha da qalibiyyətli inkişafı demək idi” – Ədalət Abdinov vurğuladı -

Ədalət Abdinov daha sonra qeyd etdi: “ Sədaqətli leninçi, inqilabın alovlu tribunu S.M.Kirov xatırlayırdı: Azərbaycanda Sovet  hakimiyyətinin qələbəsindən sonra ikinci gün Lenin yoldaş deyirdi ki, biz bu ölkəni Şərq xalqları üçün hər cəhətdən nümunəvi respublikaya çevirməliyik, bu, bütün çoxmilyonlu Şərqdə işimiz uğrunda ən yaxşı təşviqat, ən yaxşı təbliğat olar”.

Azərbaycan KP MK-nın sədri Gülnisə Mənsimova dedi: - Azərbaycan xalqının inqilabi mübarizəsinin qəhrəmanlıq tarixində, onun əmək hünərlərinin salnaməsində elə bir səhifə yoxdur ki, orada Leninin ölməz adı öz bariz ifadəsini tapmasın. V.İ.Lenin Azərbaycan Kommunist Partiyasının yaradılmasının ilhamçısı idi. Azərbaycan Kommunist Partiyasının 99 illiyi Sovet Azərbaycanın yaranma tarixi ilə bir vaxta düşür. Lenin Sovet hakimiyyətinin qələbəsi və möhkəmləndirilməsi uğrunda Azərbaycanın əməkçi kütlələrinin mübarizəsinə rəhbərlik edirdi. İliç Azərbaycan xalqını həyatı sosialistcəsinə qurmağın geniş proqramı ilə silahlandırdı. Leninin ideyaları bu gün də respublikamızın kommunist və fəhlə hərəkatının yolunu parlaq mayak kimi işıqlandırır.

İctimai fəallara mükafatların və partiya biletlərin təqdim olunması tədbirin bayram əhval-ruhiyyəsinə yeni şən ovqat qatmışdır. Bakı Dövlət Universitetinin professoru, fəlsəfə elmləri doktoru, SSRİ-nin əməkdar mədəniyyət işçisi Əsədulla Qurbanov layiqli ictimai fəaliyyətinə görə Azərbaycan Kommunist Partiyası Mərkəzi Komitəsinin Fəxri Fərmanı ilə təltif olunmuşdur. Tədbirdə çıxış edən Əsədulla Qurbanov Sovet İttifaqı Kommunist Partiyasını özünün mənəvi atası, sovet dövlətini isə mənəvi anası adlandırmışdır. O, kommunistlərin sırasında olduğunu böyük qürurla bildirmiş və həyatda qazandığı bütün uğurlara görə Kommunist Partiyasına minnətdar olduğunu vurğulamışdır.

Marksizm-leninizm ideologiyasının fəal təbliğatçısı Bəhram Sadiqi Azərbaycan Kommunist Partiyasına üzv qəbul olunmuşdur. Bəhram Sadiqinin tədbir iştirakçılarına müraciətlə söylədiyi “Kommunist üçün, leninçi üçün özünün bütün səyini, zəkasını və iradəsini uğrunda Leninin mübarizə apardığı gələcəyi yaxınlaşdırmaq üçün sərf etməkdən daha müqəddəs bir şey yoxdur” sözləri alqışlarla qarşılandı.

Azərbaycan Kommunistlər Birliyinin mətbuat xidməti