Kommunistlər iftar mərasimində iştirak ediblər

Mayın 19-da İmam Hüseyn Məscidinin axundu, sabiq deputat Hacı Əbdül iftar süfrəsi açmışdır.

Azərbaycan Kommunistlər Birliyinin İdarə Heyətinin üzvləri müqəddəs Ramazan ayı münasibətilə iftar mərasimində iştirak ediblər.

İftar mərasimi “Qurani-Kərim”dən ayələrin və Ramazan duasının oxunması ilə başladı.

İmam Hüseyn Məscidinin axundu Hacı Əbdül mərasimdə çıxış edərək dedi:

— Bismillahir-rəhmanir-rəhim! Hörmətli məclis iştirakçıları, əziz qonaqlar! İftar süfrəmizə verdiyiniz şərəfə, burada iştirakınıza görə sizə “Xoş gəlmisiniz” deyir və xoş arzular diləyirəm. Allah-Təalanın bizə bəxş etdiyi Quranın nazil olduğu bu mübarək Ramazan ayında iftar süfrəmizə təşrif gətirdiyinizə, bu müqəddəs aya hörmətinizə görə sizə xoş arzularımı çatdırır, təşəkkürümü bildirirəm. Həm də bu iftar süfrəsi başına toplaşmağımız qardaşlıq, dostluq, dinlər, millətlər arasında dialoq, vicdan azadlığı və tolerantlıq deməkdir. Mən Rəbbin dərgahına şükür edirəm ki, Allah-Təala bu görüşün səadətini və bu ayın nemətini bizə nəsib etdi. Bir daha “Xoş gəlmisiniz” deyirəm.Vəs-səlamu əleykum və rəhmətullahi və bərəkatuhu!

Azərbaycan Kommunistlər Birliyinin sədri Ədalət Abdinov iftar mərasimində çıxış edərək dedi: — Din xadimləri ilə dünyəvi insanların görüşü çox böyük əhəmiyyətə malikdir.Bu nadir imkan bizə dini mərasimlər, Ramazan ayı sayəsində qismət olur ki, bu ay ərzində iftar süfrəsi açmaq kimi gözəl dini adət vardır. Din-dövlət münasibətləri  möhkəm və sağlam təməl üzərində qurulubdur və bu gün ölkəmizin uğurlu inkişafında din-dövlət münasibətləri xüsusi yer tutur. Deyə bilərəm ki, Azərbaycanda bu münasibətlər nümunəvi xarakter daşıyır.  Əminəm ki, bundan sonra da bu istiqamətdə ardıcıllıq davam etdiriləcəkdir.  Azərbaycan istər sovet, istərsə də müstəqillik illərində öz milli, dini dəyərlərinə sadiqdir. Bizim dini dəyərlərimiz milli dəyərlərimizin tərkib hissəsidir və milli dəyərlərimizi dini dəyərlərsiz təsəvvür etmək mümkün deyil. Bizi əsrlər boyu bir millət, bir xalq kimi qoruyan, saxlayan dəyərlərimiz olmuşdur. Bu gün bu məsələyə çox böyük diqqət göstərilir.

AMAC-ın İdarə Heyətinin sədri, filologiya elmləri doktoru Tahir Cəfərli dedi: -Mübarək Ramazanın gəlişi İslam aləmi üçün böyük bir sevincdir. Çünki müqəddəs Qurani-Kərim bu ayda nazil olub. Xeyir-bərəkət də bu ayın kəramətinə yazılıb. Orucluq İslam dininin, imanımızın kamillik zirvəsidir. Bütün insanlarda Adəm övladının hər bir əməli özü üçün olduğu halda, oruc Allah üçündür. Allah da əvəzini verir. Allah-Təaladan arzu edərdim ki, tutduğunuz oruclar, etdiyiniz dualar Allahın dərgahında qəbul olunub, əvəzində isə Sizə, bütün xalqımıza, Azərbaycana xoş günlər, firavan həyat və əmin-amanlıq bəxş etsin.

İftar mərasimində Bakı Dövlət Universitetinin islamşünaslıq elmi mərkəzinin rəhbəri, fəlsəfə elmləri doktoru, professor Əsədulla Qurbanov, Azərbaycanın məşhur futbolçusu Maşallah Əhmədov, güləş üzrə üç qat dünya çempionu Məhyəddin Abdullayev, mədəniyyət işçisi Firudin Babayev və başqaları çıxış edərək əmin olduqlarını bildirdilər ki, milli mənəvi, xüsusilə  dini dəyərlərimiz, ənənələrimiz  bundan sonra da inkişafımızın əsas istiqaməti olacaqdır.

Çıxışlardan sonra İmam Hüseyn Məscidinin axundu Hacı Əbdül məclis iştirakçılarına müraciət edərək, hamıya cansağlığı arzuladı və  bildirdi ki, möhtərəm Prezidentimiz cənab İlham Əliyevin, Birinci Vitse Prezident xanım Mehriban Əliyevanın rəhbərliyi ilə  Azərbaycan çiçəklənəcək və xoşbəxt olacaq. Sizə cansağlığı arzu edirəm. Buyurun, “Bismillah” deyib iftar süfrəsinə başlayaq. İftar süfrəsinə xoş gəlmisiniz.

Azərbaycan Kommunistlər Birliyinin mətbuat xidməti