Ədalət Abdinov Moskvada Rusiyanın aparıcı kommunist partiyasının rəhbərliyi ilə görüşmüşdür

18 noyabr 2019-cu ildə Azərbaycan Kommunistlər Birliyinin sədri Ədalət Abdinov Rusiya Federasiyasının paytaxtı Moskva şəhərində Rusiya Kommunistləri Kommunist Partiyası Mərkəzi Komitəsinin Siyasi Bürosunun üzvü, Rusiya Kommunistləri Kommunist Partiyası Mərkəzi Komitəsinin beynəlxalq məsələlər üzrə katibi, deputat  İlya Kleymenov ilə görüşmüşdür.

İlya Kleymenov Rusiya Kommunistləri Kommunist Partiyası ilə Azərbaycan Kommunistlər Birliyi arasında səmimi dostluq və etibarlı tərəfdaşlıq əlaqələrinin olduğunu deyib. Ötən 3 ildə iki təşkilat arasında sıx təmaslar qurulub, qarşılıqlı səfərlər həyata keçirilib, təcrübə mübadiləsi aparılıb.

Rusiya Kommunistləri Kommunist Partiyası  Rusiya Federasiyasının ictimai-siyasi prosesində aparıcı əsas qüvvələrdən biridir - İlya Klemenov demişdir - Əlbəttə ki, müasir dövrün solçu qüvvələrin vahid mübarizə axınında birləşməsində, onların imperializmə qarşı düzgün mübarizə proqaramının işlənib hazırlanmasında və sosializmə aparan düzgün yolun müəyyənləşdirilməsində həlledici rol dünya kommunist hərəkatına məxsusdur və Rusiya kommunistlərin onlarla birgə əməkdaşlığını xüsusilə qeyd etmək istəyirəm.

İlya Kleymenov bildirdi ki, kommunist hərəkatı müasir dövrün heç bir digər siyasi hərəkatının malik olmadığı zəngin və rəngarəng siyasi təcrübə toplamışdır. Biz yaxşı bilirik ki, Azərbaycanın kommunistlər Birliyi də bu təcrübəyə malikdir. Fikrimcə, kommunist hərəkatının böyüdüyü, geniş beynəlxalq vüsət aldığı yeni şəraitdə təşkilatlarımız arasındakı əlaqələrin təşkilat formaları daha da gücləndirilməli və genişləndirilməlidir.

Azərbaycan Kommunistlər Birliyinin sədri Ədalət Abdinov səmimi qəbul üçün rusiyalı həmkarına təşəkkürünü bildirmiş və qeyd etmişdir ki, Azərbaycan Kommunistlər Birliyi özünün mütəşəkkilliyi, təşkilat quruculuğunun Lenin prinsiplərinə sədaqətli olması ilə fərqlənir. Ölkəmizdə kommunist hərəkatını gücü siyasi intriqalardan uzaq sadə kommunistlərin əqidə möhkəmliyində və mərdliyindədir. Onlar zəhmətkeşlərin işinə bütün enerjilərini verir, fədakarlıq nümunələri göstərirlər. Kommunist adı Azərbaycanda həmişə qəhrəmanlıq və qorxmazlıq rəmzi olmuşdur.

Ədalət Abdinov dedi ki, bu gün Azərbaycan Kommunistlər Birliyi imperializmin istehkamlarında fəaliyyət göstərir, inhisarların hökmranlığına qarşı, sosializmin təntənəsi uğrunda mübarizə meydanındadır. Ölkəmizin zəhmətkeşləri artıq belə bir nəticəyə gəlirlər ki, kommunist hərəkatı olmadan Azərbaycanda ictimai tərəqqi mümkün deyildir. Eyni zamanda biz yaxşı bilirik ki, dünya kommunist hərəkatının ən güclü dəstəsi Rusiya Kommunistləri Kommunist Partiyası və fəhlə təşkilatlarıdır. Kapitalizmə qarşı mübarizə aparan əsas kommunist qüvvələri Oktyabr inqilabının beşiyi olan bu ölkədə cəmləşmişdir.

Hazırda Azərbaycanda kommunist hərəkatının təsirinin güclənməsi üçün daha münasib şərait yaranmaqdadır – Ədalət Abdinov vurğuladı – Lakin ölkəmizin kommunist hərəkatının inkişafı çətinliksiz də deyildir. Bizim qarşımıza çoxlu mürəkkəb problemlər çıxır ki, bunlar da dərin marksist-leninçi təhlil və yaradıcılıq axtarışları tələb edir. Ən ciddi problemi isə Azərbaycan Kommunist Partiyasının müxtəlif qruplara parçalanması və partiyadaxili mənasız ixtilafların mövcudluğu yaradır. Halbuki inhisarçı kapitalın inkişafındakı hazırkı mərhələ, burjuaziyanın yeni taktikası Azərbaycan kommunist təşkilatının qarşısında çox ümdə vəzifələr qoyur. Azərbaycan burjuaziyası öz hökmranlığını saxlamaq məqsədi ilə Oktyabr iqilabından və sosializmin digər qələbələrindən müəyyən ibrət dərsi almaqğa çalışır. O, kapitalizm qurluşunun ziddiyyətlərini və qüsurlarını ört-basdır etmək üçün yeni vasitələrdən istifadə edir, işçi sinfini və onun təşkilatlarını aldatmaq və pozmaq, onun imtiyazlı yuxarı təbəqələrini ələ almaq üçün hiyləgər fəndlər tətbiq edir. Yerli burjuaziya əvvəllərdə olduğundan xeyli geniş miqyasda “Oğurlanmış şüarlar” taktikasını tətbiq edir. Bu taktikanın məqsədi kommunistlərin geniş yayılmış ideya və şüarlarını götürmək, onları təhrif etmək və antisosialist məqsədlərin xidmətinə verməkdir. Burjuaziyanın bu metodları Azərbaycandakı mütərəqqi solçu qüvvələrin fəaliyyətini çətinləşdirir, lakin əməklə kapital arasındakı ziddiyyətləri ləğv edə bilmir. Deməli, onlar kommunist hərəkatının qarşısını almaq iqtidarında deyillər. 

Rusiya Kommunistləri Kommunist Partiyası Mərkəzi Komitəsinin beynəlxalq məsələlər üzrə katibi, deputat  İlya Kleymenov Rusiya Kommunistləri Kommunist Partiyasının təsis etdiyi müxtəlif döş nişanları, emblemləri və nəşr nümunələrini Azərbaycan kommunistlərinə hədiyyə etdi.
Görüşdə qarşılıqlı maraq doğuran məsələlərlə bağlı geniş fikir mübadiləsi aparıldı.
Görüşdə Rusiya Kommunistləri Kommunist Partiyası Mərkəzi Komitəsinin Beynəlxalq əlaqələr şöbəsinin müdiri Aleksandr Vasilyev iştirak etmişdir.

Azərbaycan Kommunistlər Birliyinin mətbuat xidməti