Kommunist Partiyasının lideri Lənkəranda görüş keçirmişdir

Azərbaycan Kommunist Partiyası Lənkəran Rayon Komitəsi yerli zəhmətkeşlərin nümayəndələri ilə görüş təşkil etmişdir. Görüşdə Azərbaycan KP MK-nın birinci katibi Telman Nurullayev iştirak edirdi.

Tədbiri  Azərbaycan KP Lənkəran Rayon Komitəsinin birinci katibi Əlirza Cəfərov açaraq, rayon təşkilatında aparılan təşkilati və siyasi işlər barədə geniş məlumat vermişdir.

Azərbaycan Kommunist Partiyası Mərkəzi Komitəsinin birinci katibi Telman Nurullayev zəhmətkeşlərlə söhbətində bildirmişdir ki, kommunist partiyası yarandığı gündən cəmiyyətin mübariz, sınanmış avanqardı olub. Bu gün, sosializm uğrunda mübarizənin həlledici mərhələsində hər bir zəhmətkeş partiyanın strategiya və taktikasını mükəmməl bilsə, çox faydalı olar. Mövcud çətinliklərə baxmayaraq Azərbaycan Kommunist Partiyası sosial-iqtisadi problemlərin məngənəsində sıxılan kütlənin başlıca mənafeyinin ifadəçisinə, onun qabaqcıl siyasi dəstəsinə çevrilməyə çalışır.

Bizim partiya kapitalizmin təzyiqinə tuş gələn insanların mənafeyini həqiqi ifadə etmək iddiasında olan klassik siyasi təşkilatdır – Telman Nurullayev dedi – Digər siyasi təşkilatlardan fərqli olaraq sınaqdan çıxmış aydın mübarizə proqramımız var. Çox təəssüf edirəm ki, Azərbaycan Kommunist Partiyasının adına süni şərik çıxan qruplar var ki, bunlar liberal islahatçıların təsiri altındadır, burjuaziya ilə sazişçilik yolu tutmuş, vəzifələrini kapitalizm qurluşu çərçivəsində xırda islahatlar əldə etməkdə görürlər. Bu üzdəniraq qruplar hətta bir az irəli gedərək “qurultay” keçirirlər və dediklərimi orada açıq-aydın bəyan edirlər.

Telman Nurullayev vurğulamışdır ki, biz öz fəaliyyətimizdə zəhmətkeşlərin azadlığı uğrunda mübarizəyə dair marksizm-leninizmin elmi proqramını rəhbər tuturuq.

Görüş səmərəli və faydalı fikir mübadiləsi şəraitində keçmişdir.

Ədalət Abdinov