Ernesto Qevara de la Serna 14 iyun 1928-ci ildə Argentinanın Rosario şəhərində anadan olmuşdur. Gənclik illərində tibb təhsili almasına baxmayaraq, Latın Amerikası ölkələrinə etdiyi səyahətlər onun həyat yolunu kökündən dəyişdirmişdir. O, qitənin müxtəlif ölkələrində milyonlarla insanın yoxsulluq, aclıq və sosial ədalətsizlik şəraitində yaşadığını öz gözləri ilə görmüş, bu vəziyyətin səbəblərini araşdırmağa başlamışdır. Nəticədə, kapitalist istismarının və imperialist asılılığın Latın Amerikası xalqlarının əsas bəlası olduğu qənaətinə gəlmişdir.
1955-ci ildə Meksikada Fidel Kastro ilə tanışlıq Çe Qevaranın həyatında dönüş nöqtəsi oldu. O, Kubada ABŞ tərəfindən dəstəklənən Batista diktaturasına qarşı mübarizə aparan inqilabçı dəstəyə qoşuldu. 1956-cı ildə “Qranma” yaxtası ilə Kubaya gələn inqilabçılar Sierra-Maestra dağlarında partizan müharibəsinə başladılar. Çe Qevara qısa müddətdə öz cəsarəti, nizam-intizamı və siyasi hazırlığı ilə seçilərək inqilabın əsas komandirlərindən birinə çevrildi.
1959-cu il yanvarın 1-də Kuba İnqilabının qələbəsi ilə ölkədə yeni siyasi quruluşun təməli qoyuldu. Çe Qevara inqilabdan sonra Kuba hökumətində mühüm vəzifələr tutdu. O, Milli Bankın prezidenti, daha sonra isə sənaye naziri kimi ölkənin iqtisadi inkişafı və sosialist quruculuğu istiqamətində fəaliyyət göstərdi. Onun fikrincə, sosializm yalnız iqtisadi sistem deyil, həm də yeni mənəvi dəyərlərə malik insanın formalaşmasını tələb edən bir ictimai quruluş idi.
Çe Qevara proletar beynəlmiləlçiliyinin ardıcıl müdafiəçisi idi. O hesab edirdi ki, imperializmə qarşı mübarizə ayrı-ayrı ölkələrin sərhədləri daxilində məhdudlaşa bilməz. Məhz buna görə də o, Kubadakı yüksək dövlət vəzifələrindən könüllü şəkildə imtina edərək digər xalqların azadlıq mübarizəsinə kömək etmək qərarına gəldi. Əvvəlcə Konqoda, sonra isə Boliviyada inqilabi fəaliyyət göstərdi.
Boliviyada partizan mübarizəsinə rəhbərlik etdiyi zaman o, ABŞ Mərkəzi Kəşfiyyat İdarəsinin dəstəyi ilə fəaliyyət göstərən Boliviya ordusu tərəfindən mühasirəyə alındı. 8 oktyabr 1967-ci ildə yaralı vəziyyətdə əsir götürülən Çe Qevara ertəsi gün güllələnərək qətlə yetirildi. Lakin onun fiziki məhvi ideyalarının məhvi olmadı. Əksinə, ölümü onu bütün dünyada inqilabi mübarizənin əfsanəsinə çevirdi.
Bu gün Ernesto Çe Qevaranın siması dünyanın müxtəlif ölkələrində antiimperialist mübarizənin, sosial ədalət uğrunda mübarizənin və azadlıq ideallarının rəmzi kimi tanınır. Onun həyatı sübut edir ki, insan öz ideallarına sadiq qalaraq milyonlarla insanın taleyinə təsir göstərə bilər. Çe Qevara öz dövrünün məhsulu olmaqla yanaşı, gələcək nəsillərə də mübarizə, fədakarlıq və inam nümunəsi qoyub getmişdir.
Onun məşhur sözlərindən biri bu gün də öz aktuallığını qoruyur: "Ədalətsizliyi dünyanın harasında görürsünüzsə, ona qarşı qəzəblənə bilirsinizsə, deməli, biz yoldaşıq."*
Ernesto Çe Qevara XX əsrin ən tanınmış inqilabçılarından biri kimi tarixdə qalmaqda davam edir və onun adı azadlıq, bərabərlik və sosial ədalət uğrunda mübarizə ilə bağlı olaraq xatırlanır.
Ədalət Abdinov
0 Комментарии